上星期承蒙天大集團及與幾位投行老總邀請去內蒙參觀當地嘅企業同內蒙自治區經濟發展委員會探討中港融合的發展，可謂見識良多。內蒙有礦產、藥業梗係唔使講，天氣好爽，96小時嘅行程都係非常豐富，內蒙人特別熱情，豪情洋溢。可能真係北方人天生嘅熱情啦！
作為一個實戰家，睇企業先係我最大嘅目的，喺內蒙有幸參觀蒙牛乳業（02319），真係一個好值得分享嘅經驗，行咗蒙牛一個圈，好似行咗佢哋嘅時光隧道一轉咁，學到唔少嘢。
最令我深刻嘅係蒙牛由一間破舊嘅辦公室起家，用十年時間，喺乳品界分類由一千一百幾排名一路衝上第一名，佢同伊利兩個加埋已經超過六成市場佔有率，符合先進國家市場經濟戰略模式，即係一個行業有兩個市場參與者佔咗壓倒性份額，真係好犀利！
蒙牛苦戰十年嘅結果，原來同依家流行嘅企業文化不謀而合，筆者將佢嘅文化一一記低，發覺同西方管理戰略，例如質量控制、產品創新、社企責任……等等同出一路。有一樣嘢筆者好欣賞蒙牛，就係佢哋會為每一個員工提供舒適嘅居住環境、優閒設施，咁樣，令到佢哋嘅員工可以無後顧之憂，全心全意為企業打拚，我諗呢種精神，先至係蒙牛其中一個不敗之謎。
香港大學電子金融服務榮譽助理教授 徐燦傑