絲絲講場：渣打新行玩環保高科
環保意識盛行，好多企業都視環保為企業責任之一，渣打香港亦開始「無紙化」，絲絲見到佢哋日前喺銅鑼灣開咗間分行，成個感覺唔同晒，因為渣打香港加咗色，仲轉晒用電子海報及iPad介紹產品畀客戶。
前線銷售配備iPad
今次渣打間新分行除咗藍綠主色之外，仲加入咗白色嘅新設計，絲絲收到風，話渣打嚟緊一系列廣告同樣會玩黑、白兩色元素，而且呢間分行仲行埋高科技意念，將所有傳統海報換晒做電子海報，甚至連放宣傳單張個架旁邊，都擺部輕觸式電腦，等客戶自己搵資訊，真係徹底實行無紙化概念。
高科技意念當然唔少得照顧一班行出嚟見客嘅前線銷售職員，佢哋每人配給一部iPad，介紹產品畀客人時，唔使再拎紙出嚟慢慢寫，聽講今次呢間係「試點分行」，依家有二十五部iPad用緊，如果做得好，未來仲會逐步推展到所有前線銷售職員。絲絲覺得到時啲客揸住部iPad，同佢哋分享吓有乜Apps好用，分分鐘因為啱傾而做多幾單生意添。
余絲韻