內地日前發生嘅伊春空難，令證券業深感震驚，有基金公司即刻為成日飛嚟飛去做調研嘅基金經理及研究員做心理輔導，亦重申「非不得已，唔准坐埋同一架飛機」！
空難發生後，有基金公司特登開咗交流會，仲猛話喺以後嘅調研要盡量注意個人安全，尤其係基金經理，「唔單只要對個人負責，亦要對基金投資者負責。」其實大多數基金公司都有類似規定，唔畀基金經理坐同一班機，依家甚至要求研究員亦唔可以搭同一航班。
基金公司員工成日要外出調研，坐飛機已經係家常便飯，突然跌架機落嚟，梗係好影響佢哋嘅心理，所以啲公司除咗積極做心理輔導，亦向員工加強搭機安全嘅培訓。佢哋係基金公司嘅貴重資產，同投資嘅道理一樣，梗唔可以擺晒落同一個籃度啦。
余絲韻