「股神」巴菲特長期以來都被視為價值投資者嘅鼻祖，《財富》雜誌趁巴菲特八十大壽之日，回顧歷來以佢做封面嘅雜誌期數，數數吓原來「股神」自一九八六年至今，最少榮登《財富》封面13次。睇番八六年嘅《財富》封面，巴菲特個樣固然後生好多，封面設計都好八十年代Feel。
嗰期巴菲特做到封面人物，並唔係因為投資回報驚人，而係佢當年對於處置遺產嘅睇法已經好具啟發性──「留給下一代最好嘅遺產金額，係足夠佢哋做任何事，而不足以令佢哋無所事事。」
「股神」尋日80歲大壽，各界好友、名人及傳媒紛紛道賀，財經網站CNN更以「全球最偉大投資者」過80歲生日為題，不但讚揚巴菲特嘅投資技巧高超，更致力於慈善工作，財富與善心兼備。
《Buffett's Bites》作者里滕豪斯話：「喺○一年你帶領我8歲嘅女兒參觀你嘅辦公室，你邊飲櫻桃味可樂，邊以Geico嘅壁虎標誌講笑，你又幫我女兒影印手掌。我女兒話『你比佢更似一個細路』。祝你80歲依然青春。」
每年都接受「巴菲特慈善午餐」慈款嘅慈善基金Glide，創辦人Janice Mirikitani及威廉斯齊齊祝巴菲特生日快樂，多謝佢作出嘅貢獻，全靠佢嘅慷慨，Glide先可以對貧苦大眾表達關心，並為佢哋帶來希望。
為巴菲特撰寫自傳《雪球：巴菲特傳》嘅艾利斯‧施洛德（Alice Schroeder）話：「巴菲特喺世界各地都備受尊崇，因為佢證明用正當手段都可以成為富翁，唔使走捷徑，不需變得冷酷無情，佢有一個完人嘅形象。」
余絲韻