孖妹缸湖遊：新學期股法研讀

揀啱藍籌進修唔怕貴

學而優則士，讀多啲書點都有用嘅，最重要係趁早讀。過去幾年碩士課程加價幅度真係幾厲害，舉例一個本地大學嘅MBA課程費用由10幾萬元誇張咁升到40幾萬元，過去10年上升1.76倍，年度化升幅近20%。孖妹粗略計過，要抵銷咁貴嘅學費，買入過去10年升幅最多嘅藍籌就掂，呢隻就係中國海外（00688），股價10年升咗17倍；不過若買咗中信泰富（00267），就未儲夠學費。

如果「沙紙」可換到錢，相信今期兩位專家都賺個滿堂紅。有「基金小馬哥」之稱嘅前東方匯理資產管理大中華地區基金分銷主管謝汝康擁有兩個碩士學位，最犀利係金融、財策及保險等國際認可專業資格有24個之多，佢屬於九十年代嘅考生，當時坊間冇賣「雞精書」，佢就喺圖書館將50幾本書輯錄自製Notes。另一位「美女策略師」花旗環球個人銀行服務投資策略及研究部主管張敏華，亦喺○四年考獲科大工商管理系碩士，女主播搖身變策略師。

謝︰「基金小馬哥」謝汝康

張︰花旗環球個人銀行服務投資策略及研究部主管張敏華

跌市「溝貨」先定底線

莉莉︰嚟緊新學期，你嘅個人投資時間表係點㗎？

謝︰由於有投資需要申報嘅限制，我主要投資月供產品包括基金及ETF（交易所買賣基金），市場配置方面就主攻可持續發展嘅地區，如中國、拉丁美洲、印度及南韓等，大市調整時通常會供多兩倍，反而好少減注。我每年冇設定指定投資目標，只有指定「儲錢」目標。

高妹︰多隻股份被市場逐一洗倉，散戶可以點樣避開被震倉？

謝︰大市向下時，散戶「溝淡」買貨要有學問，首先要問自己：「嚟緊港股最大跌幅有幾多？」假設心中最差嘅底線係再跌三成，就將一筆錢由依家到底線分開四段買入，即係依家入市，之後每跌一成就再入市一次，只要大市由谷底上升一半已可回本，呢個係「價值分段入市法」，而唔係用時間性分段，所以散戶亦要學會投資唔好太心急。

莉莉︰依家市場一窩蜂咁支持人民幣產品，你又點睇？

謝︰其實散戶唔需要太急搶住買「人仔」產品，可以等到「小QFII」放行，到時資金直接投資境內「人仔」產品，如國企發行嘅企債或可換股債券，得到嘅回報會高啲。再者銀行依家用高息吸客，好明顯都等緊「小QFII」開車，喺呢個時候散戶不妨做人民幣定存，利率較高、投資年期又唔長，達到進可攻、退可守；其他高息貨幣就可以選擇澳元及加元。

「牛二」市悶 吼收租股

高妹︰對於應考CFA（特許財務分析師）嘅考生，若考咗兩次都「肥佬」係咪要放棄呢？

謝︰我有朋友考咗8年，今年終於考上。一直以嚟，CFA所考嘅理論冇改變，但考試形式每年有轉變，變得美國化咗，多咗選擇題。

莉莉︰港股似無定向風上上落落，散戶呻難炒，九月應點樣部署？

張︰「牛二」期間股市係有排上落，考驗散戶嘅耐性，應該將目標放到中長線，每次見低位就買貨。另外，喺新學年散戶可留意美元走勢，九月一日美國聯儲局宣布更詳細嘅上次議息紀錄，預期息率態度會「Low & Longer」，維持時間較長嘅低息環境，估計美元匯價亦會慢慢轉弱，美國明年都唔會考慮加息，中央亦會等耐啲，最快明年第三季先會上調息率。

高妹︰喺超長低息環境下，邊一類資產會有高回報？

張︰低息加上弱美元有利港股及新興市場股票，預計第三季恒指只會浮浮沉沉，第四季先有明顯反彈，今年底恒指目標可升上23,500點。我建議買本地收租股，因為公司收入夠穩定。

內險股及網股潛力大

莉莉︰收租股包括希慎（00014）、九倉（00004）及太古A（00019），其中太古A每股中期息仲派1蚊，回報都唔錯！

張︰中資股方面，暫時唔好沾手原材料股及內房股，分別會受經濟增長短期內放慢及中央政策困擾，沽售壓力較大。我推薦零售、互聯網及保險類股份，因為內地消費者對網遊及保險有驚人需求，長線會有好大潛力。

講番喬布斯嘅畢業典禮感人演講，大家可以喺YouTube重溫段片，佢講到自己人生觀係點樣形成，由自己私生子身世，年幼時一度冇錢交學費，再坦白道出被自己創立嘅公司炒魷魚，最後克服胰臟癌重生嘅點滴。演講辭結語係咁嘅︰「Stay hungry，Stay foolish（保持渴求及求知欲）」，佢可以行到呢步，就係靠個人嘅鬥心。

67%人估港股繼續尋底

恒指升勢冇乜聲氣，市場仍憂慮美國經濟，繼七月初後，道指上周二再失守一萬點大關，港股一向與美股關連性好大，短期會受影響向下尋底嗎？據今期《東方產經》網上民意調查，截至上周末晚上6時，67.4%人認為港股會繼續下沉，其餘32.6%就有信心咁話唔會。

高妹、莉莉

若有料報畀高妹同莉莉或有嘢問，可電郵money.biz@opg.com.hk