筆者好少講政府，因為講政府永遠嘅睇法都係好分歧，自從港府又出招打擊樓市，唔使講，全線實力地產股梗係「應聲一插」啦，都要做吓樣跌吓啦！唔係仲得了嘅咩！
講真，喺「二高二低」，即係低息、低供應，同高薪酬、高通脹嘅大前提下，樓市似乎大方向往上衝應該都係唔變，政府好多時候做嘅嘢真係奇奇怪怪，起完錨，又出招「做騷」。大家都知我哋有個叫聯繫匯率，讀經濟都知低息意味通脹，如果經濟學講得啱，人為干預價格，咁樣「資產泡沫」呢個亮麗嘅名詞又可以用另一種形態出現。
政府以為出招可以解決問題，其實真係錯咗，事關「摸貨」佔整體樓市成交只係一個單位數字，低利息先至係成件事嘅元兇，賣地成績理想，又再一次印證政府出招嘅不及時同埋不切實際，真陰功！
好多80後都慨嘆政府不施援手，入唔到市，我教朋友理財，永遠都係「目標為本」，入市買樓，唔一定要新樓，正所謂「萬事起頭難」，「一路悲只會一路哀」，仲慘，無論細價樓抑或舊嘅樓，都係你開始嘅第一步，默默向上游啦！
幾年前筆者喺香港其中一間大學講Talk，學生梗係鍾意我啦，有個學生話要跟我讀4個碩士「創造事業一片天」，我同佢講，以前我讀咗40萬元，依家照跟都要100萬元，有錢不如去投資物業啦，仲讀書，咁你哋收到未啊？
香港大學電子金融服務榮譽助理教授 徐燦傑