絲絲講場：半數董事同時唔撈 舜宇冧價急解畫
近期唔少公司有人事變動，引起市場揣測，舜宇光學（02382）前日出通告，有兩名非執董、兩名執董及兩名獨立非執董齊齊辭職，即係有半數董事局成員同時間「唔撈」，尋日股價因而一度勁跌11%，公司昨晚再發通告解釋。
6人辭職各有原因
據舜宇執董孫泱解釋，辭職嘅董事中有兩人因年紀大要退休，另有兩人因發展新業務而辭職，又咁啱合約到期，所以同一時間公布晒佢哋辭職。
6位董事嘅辭職生效日期都係九月一日，絲絲翻查呢間公司嘅年報，兩名獨立非執董張未及鈴木浩二分別已68歲及70歲，孫泱話佢哋兩位已屆退休之齡，另外兩人係另謀高就，另一人就因基金人事變動問題，再無代表基金公司，加上佢哋3年嘅合約已滿，係時候輪換，所以辭職。佢話估唔到市場會咁大反應，但公司已委任瑞聲（02018）財務總監朱鵬飛做獨立非執董，另委任沙燁做非執董，叫投資者唔使擔心公司業務。
講開公司業務，孫泱話上半年業績增長理想，公司盈利增長134.2%至5,482萬元人民幣，主要係高像素手機鏡頭及照相模組嘅出貨量上升，佢話下半年會有兩個新嘅國際性手機商客戶，公司將有更多手機照相模組嘅定單，預期明年有盈利貢獻。
余絲韻