有「賺錢之神」稱號嘅邱永漢，除咗買股票有心得，佢亦曾經喺本港樓市賺大錢，最經典係九七年帶領日本投資者狂掃650個太古城單位，高價賣出獲利3倍。絲絲知道近日佢帶咗一班日本投資者去考察，見到「賺錢之神」就問吓佢本港樓價係咪好貴，會唔會有泡沫爆破危機，佢話終有一日會爆破，問佢估幾時會爆？佢就笑言「天知曉」!
雖然邱永漢已年屆86歲，但佢依然身體力行，不斷周圍去實地考察，之前佢去過巴西、印尼及菲律賓等地，近日佢帶日本投資者到佢嘅「愛股」亨泰（00197）參觀廠房，今次係佢第65次帶團出訪。佢寫過400多本有關投資嘅書，認為「資源有限、供應有限」嘅產業，如糧食、水及新能源係有成長價值嘅行業，閒時佢最鍾意發掘「成長股」，即係增長潛力十分高嘅股份。
絲絲趁機會問呢位投資專家近期有冇搵到新嘅「成長股」，佢話依家好難搵到，喺佢嘅投資心法中，要每年盈利增長50%嘅企業先至係成長企業，而且佢認為「股票的利益是忍耐得來的」，所以長線投資先至會贏大錢；香港人係好積極搵錢，但就多數係短線投資。
余絲韻