彭博資訊○九年全球對沖基金績效排名中，「睿智華海基金」以237.2%嘅驚人回報穩守第2位，令到管理呢隻基金嘅睿智金融資產管理執行董事張承良迅即成為「對沖基金強人」。絲絲知道佢出身於湖北，細個時捱過窮，26歲時靠獎學金去英國讀博士學位就揀咗主修經濟學，原因係可以搵到多啲錢。不過今日生活無憂嘅佢就話：「金錢係有用，但唔係萬能」。
張承良坦言喺英國讀書時，都因為搵錢而做過唔少苦工，好似去中國餐館做洗碗，聖誕節時又去超市做食物包裝等。佢笑言：「當時我望住牆上嘅鐘，心諗轉快啲、轉快啲喇，唔明點解個鐘會轉得咁慢，然後我就知道自己唔係太鍾意呢啲工作。反而依家做投資，每日嘅時間都過得好快，可見賺錢除咗睇個人能力之外，亦要視乎個人興趣。」
絲絲當然認同「錢唔係萬能」嘅道理，因為錢係買唔到真正快樂，張承良話：「我希望子女努力讀書，但唔會限制佢哋嘅興趣發展，唔一定要跟我搞金融，做律師、當畫家甚至搞文學都可以，重要嘅係知道想要乜嘢生活。」張承良除咗炒股叻之外，原來佢管教子女都有一套。
余絲韻