最近內地不斷有人發現有啲年紀細細嘅「娃娃股東」，未成年就成為百萬富翁，都咪話唔令人嘖嘖稱奇。話說浙江紹興創業板有間叫向日葵光能科技股份嘅公司，最近進行公開招股，畀人發現公司入面有位年僅六歲名為吳沁怡嘅女仔，竟然出現喺公司嘅股東名單之內。如果以上市時嘅發行價計算，手持六點二五萬股嘅呢位小妹妹，身家就已經有一百零五萬元，短短一夜之間就成為咗百萬富翁。
不過咁樣都未算厲害，經過一輪明查暗訪後，絲絲發現原來呢類「娃娃股東」喺內地其實為數不少，之前更有一個十三歲嘅「小股東」，因為廈門三五互聯成功上市，身家暴升成為咗千萬富翁。
至於點解小朋友未成年都可以持股做到股東？原來呢班「娃娃股東」背後都有一段段悲慘往事。
例如年僅十三歲嘅郭含遠，原來佢係三五互聯原副經理郭少鋒個仔，但郭少鋒突然去世，而郭含遠就繼承咗亡父嘅三五互聯股份，加加埋埋有成廿幾萬股，市值聽講都有成千萬。
余絲韻