中信泰富（00267）主席常振明係圍棋高手就係人都知，不過估唔到佢可以犀利到將捉圍棋與經營一間公司結合埋一齊，佢喺公司尋日個業績報告度就大談心得，話經營中信令佢聯想到捉圍棋，一定要做到隨時預見變化，而且要提前做好計劃及部署，要成為優秀嘅圍棋手，唔單只要有直覺及悟性，仲要有分析能力及戰略技巧咁話。
常總指出，棋手必須充分了解對手嘅性格及棋風，先至可以準確預測對手嘅每一步，喺商場上亦要真正做到知己知彼，才可以更上一層樓。
佢又話擔任中信泰富主席一職係佢職業生涯中最富有挑戰性嘅工作，要求亦都係最高嘅，家陣佢坐鎮嘅中信泰富無論實力及發展方向，佢都愈來愈有信心，又話好感謝中信泰富嘅股東，因為佢哋無論喺順境或困難嘅時候都支持公司。佢話中信泰富要成為行業嘅領軍、公司管治嘅最佳典範，而且要令員工以喺中信泰富做嘢而感到驕傲喎。
佢又提到年度股東大會嘅重要性，係在於可以畀管理層聽吓股東嘅想法，當然好歡迎股東坦率直言，不過佢都承認，平心靜氣咁聽取有時非常尖銳嘅批評，的確唔係一件易事。
余絲韻