「股神」巴菲特及微軟創辦人蓋茨發起嘅「捐身家」慈善計劃，海外勸捐第一站係中國，佢哋下月底就會來華，邊個係「股神」最先游說嘅對象成為咗市場焦點。
《華爾街日報》就問過蓋茨基金會發言人，佢哋話仲討論緊要見面嘅人選，不過坊間就開始猜測，「股神」嘅好友以及有過直接商業來往嘅人好大機會喺見面名單內，排第一位嘅莫過於「股神」入咗股嘅比亞迪（01211）主席王傳福，另外曾經用天價與「股神」共進午餐嘅步步高創辦人段永平以及「中國私募基金教父」趙丹陽亦係人選之一。
當遇上天災人禍，內地富豪都好踴躍捐輸，但《德國之聲》報道，「股神」今次嘅如意算盤未必打得響，因為大部分內地富豪都係白手興家，對捱苦日子有深刻體會，更加會死守自己財富，若將一半身家捐出嚟支持慈善，佢哋會好驚有日會再捱窮。
不如咁啦，中國有13億人口，一人捐一蚊，「股神」又制唔制呢？
余絲韻