證券業協會永遠名譽會長兼資深經紀張天生出名識飲識食，一向視美食為人生最大享受，依家經紀行業個個講緊港交所研究延長交易時間，由以往嘅4粒鐘增至5粒半鐘，若一旦落實，第日經紀佬肯定要縮短午飯時間，對此大家議論紛紛，張天生咁鍾意食嘢，縮短午飯時間對佢咪好大影響？
張天生同絲絲講，話第時如果午飯時間真係縮短到一粒鐘，肯定可以慳番好多出外食飯嘅應酬錢，佢笑言依家一個月去不同會所食飯簽嘅單，為數真係不少㗎！第日如果縮短咗午飯時間，佢就會整個「愛心飯盒」帶番公司歎，佢話平時都有下廚整番幾味，如果整「愛心飯盒」，可能比出外午宴更加好味呢！
雖然縮短午飯時間對佢個人嚟講冇乜所謂，因為佢啲客已上咗年紀，佢唔使喺午飯時間見客搵生意，但佢話對於行業嚟講，好多人會受影響。
講番美食，雖然依家大熱天時，佢今個禮拜仍會返家鄉尋找美食，可見佢對家鄉美食嘅鍾愛。
除咗食物之外，佢亦好識享受人生，早前與一班親友去西班牙及葡萄牙旅行，咁啱撞正西班牙對荷蘭嘅世界盃決賽，當地氣氛超高漲，佢話能夠親身體驗，真係一世難忘，再配埋當地嘅風景及美食，仲好過去南非睇世界盃喎！
余絲韻