自從哈繼銘向中金遞信辭職，過檔高盛做投資銀行部嘅董事總經理後，市場都關注邊個會接替佢坐中金研究部首席經濟學家嘅位置。尋日好多內地媒體同時報道，話中金新任嘅首席經濟學家，將由巴克萊資本嘅中國首席經濟學家彭文生擔任，報道仲話彭文生日後工作嘅地點將由香港遷移到北京，但就未有提及幾時上班以及有幾高人工等資料。
見到報道，絲絲本來諗住第一時間打電話畀彭文生恭喜吓佢，順便問吓佢幾時返新工，但點知佢一拎起電話，就猛話「唔知道、唔知道」，當絲絲再問佢係咪轉工嘅時候，彭文生就再唔係答「唔知道」，而係話「唔評論」。咁又係嘅，自己係咪轉新工又點可能「唔知道」，但就可以「唔評論」。絲絲諗番，其實「真的假不了，假的真不了」，彭文生係咪轉去中金，好快就知道，都係唔使太心急。
余絲韻