港交所（00388）近期確係頻頻出招，似乎要喺「別人冷靜時，佢話要警醒」咁話，為將來作好準備，交易所班高官確係好嘢！
繼提升交易系統之後，依家連交易時段都想同阿爺市場「同步追蹤」，似乎大家對呢個共識一早得到確認。
大家都知全世界嘅交易所都以「阿爺市場」為一個重要根據點，依家新加坡同日本都話要建議延長交易時間，港交所又點可以唔跟呢！不過，最大嘅阻力，唔使講，一定係班「金牌經紀」啦！
眾所周知，香港證券市場大部分都係B及C組嘅證券行，佢哋由二○○○年開始，已經要不斷轉型求生。無疑港交所嘅動作、大方向係好，但係B、C組經紀嘅配合亦都非常之重要，如果唔係，又會有人話港交所又喺度幫「老外」，放棄多年嘅「自家人」，都咪話唔進退兩難。
「同步追蹤」只係第一步，仲有好多技術性問題其實都未解決，例如金融產品點樣可以互相掛牌啦！上市公司帳目互認上嘅問題，仲有，內地市場有個停板機制，呢個亦都係一個非常緊要嘅問題。
希望港交所搞「中港互通」嘅時候唔好「眼高手低」，最後，只會令到香港金融市場再一次跌入「無間道」裏面，咁就大大鑊！
香港大學電子金融服務榮譽助理教授 徐燦傑