全球經濟雖然不景氣，唯獨中國消費力就一枝獨秀，所謂「風水輪流轉」，家陣一班中國富豪、富太出埠掃名牌，根本唔使睇價錢，就連買豪宅別墅都毫不手軟，今年仲喺英國消費榜攞埋第一新貴嘅寶號。不過賺「人仔」都唔係講咁易，有英國地產佬就話，想做得成中國人嘅生意，最重要學識風水。
呢位倫敦豪宅區地產經紀咁有心得，原來係由於試過碰上一對中國夫婦，佢哋雖然睇中一間400萬英鎊（約4,200萬元人民幣）嘅豪宅，但最終因為風水師傅一句「風水唔好」，就毫不猶豫取消單交易；所以佢得到嘅教訓就係，唔想「見財化水」就要落啲工夫，好似要明白「四」字嘅忌諱等，因為中國人篤信風水命理咁話。絲絲真係估唔到，中國風水學會喺咁嘅情況下發揚光大，睇嚟外國大學遲啲要搞多個選修課程，先追到市場需要。
余絲韻