絲絲講場：中移初搞搜索咁快就話上市？
尋日中移（00941）母公司與新華社簽約合作成立搜索引擎公司，同日外電又訪問咗一間內地移動搜索服務公司宜搜嘅首席執行官汪溪，初頭絲絲見到篇報道話，呢間「中國移動搜索公司」希望兩、三年內可上市，就以為係中移將分拆搜索業務上市。
宜搜與中移冇關係
點知去佢哋個網站睇吓，發現公司簡介內並冇話中移係股東，所以絲絲有理由相信呢間宜搜只係中國嘅一間移動搜索公司，而唔係中國移動嘅一間搜索公司。
不過講開呢間宜搜嘅首席執行官汪溪，佢做生意嘅策略其實都與中移有異曲同工之妙。話說好多人都以為喺內地做生意，一定要喺一線城市發圍，貪嗰度人均消費較強，但汪溪偏偏相反，先做農村市場嘅生意，並制訂咗一套「農村包圍城市」嘅策略，大家係咪覺得似曾相識呢？之唔係中移早幾年前嘅「藍海」策略囉，由於中移早着先機，一早進軍農村市場，先可保持每月上客幾百萬戶嘅增長。既然理念相同，唔知他日中移與宜搜有冇進一步嘅「發展」空間呢？
余絲韻