絲絲講場：ECFA捱轟馬蔚華解圍
尋日喺台北舉行咗一場「兩岸和平創富論壇」，兩岸嘅金融界代表都有出席，近日難得現身嘅台灣金管會副主委李紀珠，畀台灣業者炮轟ECFA（兩岸經濟合作架構協議）對門開得太細，勢估唔到要由招行（03968）行長馬蔚華幫手打圓場。
對於兩岸ECFA有關金融業部分，證券業投訴連門都搵唔到，李紀珠喺簽約翌日清晨就接到券商嘅咆哮電話。尋日銀行界又趁機會向佢呻，話登陸表面係三選二，其實只能揀設立分行。你一言，我一語，猛話ECFA對門開得細，台灣金融總會會長許嘉棟笑笑口咁話，「李紀珠今日係頂住鋼盔出席」。
招行鍾情寶島金融
眼見李紀珠頂鋼盔就嚟穿，馬蔚華即刻幫佢打圓場，仲話對門既然開咗，企穩第一對腳，第二對先至入到去，只要企啱，舞台會比心目中大好多㗎。李紀珠冇變炮灰都係要多得馬蔚華，馬行長仲喺傳媒面前表面心迹，話招行對台灣金融情有獨鍾，係因為台灣金融市場化比大陸早20年，可以避免大陸「行歪路」喎。
余絲韻