絲絲講場：馮國綸閉關忙搞私有
利豐（00494）與姊妹公司利和經銷（02387）喺本周二雙雙停牌，尋日利豐趁公布中期業績宣布埋利豐私有利和經銷嘅計劃，絲絲喺記者招待會只係見到利豐總裁樂裕民唱「獨腳戲」，唔見馮氏家族兄弟嘅影蹤。
罕有缺席業績會
樂裕民第一時間解釋，話董事總經理馮國綸為咗審慎起見，要幫手搞利和經銷私有化單「Deal」，而且時間好趕，所以冇出席記招。
絲絲記得，喺以往利豐嘅業績會上，馮國綸會孖住樂裕民一齊講解業績及回答記者問題，不過今年就好罕有地只見樂裕民。為咗避免在場人士誤會馮國綸係咪避席，樂裕民一開始就解釋馮國綸唔出席業績會嘅原因，又話今次私有利和經銷，係利豐上市以來最大嘅一單「Deal」，馮氏兄弟好重視，所以大家都好緊張。
樂裕民尋日心情靚，皆因利豐上半年業績增長強勁，近年每逢公布業績嘅同時都會公布新收購項目，佢仲話新收購會陸續有來，叫大家拭目以待喎。
余絲韻