中國移動（00941）喺一個漫長嘅「股價困獸鬥」後，終於由70元至80元之間，一跳而上，企喺82元樓上，向○九年八月高位90元大踏步，都咪話唔犀利。大家都知道中移不嬲都係大大隻，行又行得慢，所以我較傾向叫人買輕微價內輪嚟食呢次嘅升浪，起碼本小利大，好過成舊錢放喺度等發酵，唔符合經濟原則。
與其要做嘢，又係「三一萬能俠」概念，即係三網合一啦！不如用管理學嘅智慧──「尋找相關股份，向股市出發」咪仲好。今次睇到隻星辰通信（01155）。
睇睇佢嘅數據，往績PE大約8.7倍，P/B 1.2倍，如果有力水追番同業平均水平嘅50%，計吓數都有4元，唔好咁盡，3.5元走晒，潛力都唔錯。
大家都知，星辰為內地三大無線覆蓋解決方案主要供應商之一，主要銷售相關系統設備、基建工程，仲加埋數碼電視傳輸網絡產品，喺「三一萬能俠」嘅位置上互相輝映，佢嘅客戶雖然得嗰三件，但件件勁揪，有中移、中電信（00728）加聯通（00762），佔咗佢九成以上嘅生意額，好嘢！大家都知電訊商嘅「黃金十年」亦都正式開始，喺「你好我好」呢個大同世界概念下，星辰又點會唔起飛呢！
加上管理層一臉自信，恢復派息及十送一紅股，簡直係「自信滿心裏」，睇吓喺「三一萬能俠」效應下，星辰點樣一飛沖天啦！
香港大學電子金融服務榮譽助理教授 徐燦傑