百度喺內地搜尋引擎嘅地位已經好穩固，不過阿里巴巴嘅馬雲及搜狐嘅張朝陽尋日就向百度宣戰，雙方將喺搜狐嘅搜尋引擎業務「搜狗」進行合作，張朝陽仲表明要將「搜狗」發展為中國第二大搜尋引擎！
馬雲今次係透過阿里巴巴（01688）母公司阿里集團以及佢有份創辦嘅雲峰基金，共同投資「搜狗」業務。據新華社報道，待重組完成後，「搜狗」將成為由搜狐持股六成八、張朝陽持股一成六、阿里集團及雲峰基金持股一成六嘅獨立業務，雖然有關重組暫仍只處意向書嘅階段，但張朝陽已向外表明「展開重組係由於『搜狗』立志成為中國第二大搜尋引擎、要獲得受人尊敬嘅市場份額」，大有要成為強勢第二位。
據內地之前嘅統計，百度與Google估計已取得內地九成市佔率，「搜狗」顯然係想爭取市佔率，以搜狐加埋阿里集團旗下所控制嘅雅虎中國以至阿里系內其他網站嘅強大客戶群，張朝陽與馬雲今次嘅雙劍合璧的確不能忽視。
余絲韻