米酒係南方家庭廚房必備嘅調味料，但又點會估到台灣想降低米酒稅，都畀歐美投訴，仲猛話要告到世界貿易組織（ＷＴＯ）呢？諗落都係當年急住「入關」種落嘅禍根。
當年喺關稅暨貿易總協定（世貿嘅前身）入會談判時，台灣嘅洋酒代理商畀料美商，要喺烈酒談判上咬實米酒，堅持米酒係蒸餾嘅烈酒，希望將威士忌、拔蘭地等入口烈酒嘅酒稅與米酒綁埋一齊，爭取最有利嘅進口條件。點知台灣心急，竟然應承美國嘅條件，連後來對歐盟嘅談判都用呢個標準，於是紅標米酒變成烈酒，酒稅急升，米酒每樽由二十二元（新台幣‧下同）暴漲至一百八十元，坊間嘈到拆天，而大堆逃稅嘅劣質米酒就充斥市場，仲「五樽賣一百蚊」。依家紅標米酒賣五十元，消費者都嫌貴。
台府為咗杜絕私酒以及維謢大眾健康，想將紅標米酒減價至二十五元，即刻收到歐美嘅投訴，仲話如果台灣修法降低米酒稅率，就會向世貿告狀。行政院副院長陳冲話會努力說服其他國家，「必要時可以再請佢哋食燒酒雞」，以證明米酒係用於烹調喎。
余絲韻