絲絲講場：經典大鱷來港撐里昂
絲絲聽講「華爾街大鱷」九月中會衝擊香港，仲要係里昂證券鋪橋搭路添！不過大家唔使驚，嚟嘅只係喺電影《華爾街》入面飾演華爾街大鱷Gordon Gekko嘅米高德格拉斯。佢會嚟香港出席里昂證券舉辦嘅投資論壇，與投資者分享影片製作、放棄核計劃、防止小型軍火買賣等議題，里昂仲會請客睇埋《華爾街》續集添。
米高德格拉斯出席論壇
米高德格拉斯係荷里活殿堂級人馬，當年憑《華爾街》第一集勇奪奧斯卡影帝，今次喺金融海嘯後再與奧利華史東合作，捲土重來出演續集《華爾街之金融大鱷》，夠晒噱頭，特別係依家普羅大眾咁仇視華爾街，相信可吸引唔少觀眾。
克林頓佩林均曾來撐場
今年係里昂第17年搞投資論壇，詳細嘉賓名單遲啲會正式公布，絲絲記得佢哋以往都請過好多好特別嘅人物嚟香港參加論壇，等班客仔唔使齋聽較悶嘅金融討論，接觸多啲另類人物，眼光都可擴闊啲，以前佢哋就請過美國前總統克林頓、參加過美國副總統競選嘅阿拉斯加前州長佩林等。
除咗米高呢位大鱷之外，據講另一「大鱷」好快浮面，早前傳出索羅斯旗下基金入股中國澱粉（03838），佢同樣喺九月搞大型考察團，據講逾200位基金經理及股評家獲邀去山東，基金經理話咁大場面係近期少見。
余絲韻