市場熱線：上石好戲在後頭

雖然現貨場成交額縮水至534億元，但期貨場未平倉合約已超過9萬張，係近三四個月冇見過咁情況，睇嚟呢個月有好戲上演。八卦公話上周五有期貨大戶急急開好倉，數量超過一千張，上到21,600點水平再開好倉，古勝預計今個月目標未必係二萬二咁簡單，有機會衝破22,300點甚至更高水平。

「大魔頭」捧內銀股

派咗成績表的大隻佬，以和黃（00013）最省鏡，股價由50元邊起步，足足升咗兩成。港鐵（00066）昨日亦升逾4%，過兩日派成績表，睇嚟又報佳音。紅色錢莊今日由民生銀行（01988）先揭開序幕，「大魔頭」吹水報告捧紅色錢莊，表示目前紅色錢莊的估值唔算高，派完成績表將獲重估，即係家陣可以買定貨等食胡。藍色大隻佬以利豐（00494）升5%至37.7元最厲害。

本地地主反彈，「鄉下佬」（00017）升逾3%，超人旗艦（00001）錄得2.2%進帳。巨無霸大笨象（00005）跟祖國移動此起彼落，前者上周派成績表後發力，威完幾日依家抖抖氣，後者則接力做魚缸火車頭，昨日升近2%。芬佬線話大笨象未有耐升完，睇番大部分吹水報告，目標價閒閒哋90元樓上，在下認為趁大笨象抖氣可把握機會上車。

重磅股派成績表前落鑊，月底先派成績表的上海石化（00338）上周已見發力，走勢突破，昨日又升逾3%，高收3.31元。表叔線來料，話上石唔單止份成績表相當靚仔，跟尾仲有老利消息公布。上石去年成功扭虧，錄得15.9億元人仔盈利，今年首季盈利再勁升4.5倍至8.95億元人仔，每股資產淨值為2.256元人仔。

阿媽或再提私有化

阿媽中石化（00386）早已先後將鎮海煉化及北京燕化私有化，孖屐一直憧憬下一水輪到儀征化纖（01033）及上石私有化。阿媽曾在○七年向上石A股股東提出股權分置建議，最終被否決。而股改後來胎死腹中，之後「油魔」發惡，也對私有化計劃構成障礙。如今上石已恢復盈利，油價走勢暫時相對穩定，中石化再提私有化亦有可能。

記得中石化當年以2.4倍市帳率作價同時私有化燕化及鎮化，家陣用番2.4倍市帳率作為目標，以NAV2.256元人仔計，折合約2.57港元，計一計條數，即私有化作價可能高見6.17元，以昨日3.31元收市價計算，值博率極高。若然純炒業績，要見番4元亦唔難。

戰報

中糧控股（00606）+19%

股博士上月二十八日指中糧具吸引力，昨日高位10.3元，較推介當日低位8.63元累升19.3%。

超威動力（00951）+14%

帥哥上周五指超威再展升浪，當日低位只有2.13元，股價昨日一度高見2.43元，升幅達14%。

古勝