中國銀聯推出嘅深港跨境繳費服務已籌備多時，尋日就喺深圳搞咗個幾隆重嘅跨境繳費開通儀式，現場見到兩地財金官員，包括人行副行長及金管局最高領導人，而且仲有大批本港「賓卡」，好多係平日較少露面，但總有啲係見慣見熟，包括中銀香港（02388）總裁和廣北及大新銀行執董藍章華。
聽講今次大會請咗約20間香港銀行高管人員出席盛會，有成30名「賓卡」捧場，但絲絲望來望去，有中銀、恒生（00011）、渣打及其他中小型銀行嘅代表，就係見唔到滙豐代表，唔通絲絲睇漏眼？
經打聽之下，好似話應邀嘅滙豐代表適逢全部都要出差，所以唔得閒嚟。咁又係嘅，佢哋集團咁龐大，業務遍布88個國家，單係亞太區業務都涉及逾20個國家咁多，啲高層成日都要飛嚟飛去，加上剛啱公布咗業績，當然要忙於見好多人。
余絲韻