八達通──一個與香港人息息相關的名字，搭車要搵佢，去7仔要用佢，都咪話唔犀利，佢嘅滲透率超勁。有人曾經講過一出街你只要有身份證、手提電話，加埋八達通，咁你出街行一日理論上都可以無憂無慮。
八達通之所以係香港嘅「榮」，因為佢係一個同香港人一齊成長嘅品牌（同維他奶一樣，與香港人共度多載，發揮「stand by me」精神）。佢嘅策略性股東港鐵（00066）當然係功不可沒，亦都因為有一個咁強嘅後台，先可以一天一天咁長大，一日惡過一日。
八達通更加成功嘅係佢哋將呢種非接觸式智能卡系統走向環球，進軍阿姆斯特丹甚至到中國大陸，佢嘅出現將香港品牌嘅原創精神一步一步咁走向國際舞台，都咪話唔勁揪。筆者教書嘅時候都經常講，如果八達通他日上市，一定要買少少，因為佢有公用股嘅穩定性同埋概念股嘅炒作性。
八達通之所以係香港嘅「辱」，唔使講梗係因為佢近幾年不誠實嘅表現，包括扣錯數，近期加埋將香港人對佢投以信任嘅私人數據，以商業形式手段出售，但係班阿姐又死唔認，真吹脹！
正所謂「有早知，冇乞兒」，最終東窗事發，搞到我哋講親八達通都唔happy，筆者覺得做錯咗唔緊要，最緊要勇於承擔同埋知錯能改，你睇以前有幾間奶類產品公司都曾經發生過同類型事件，最終，唔使講，梗係危機管理同邊個有企業責任佔優啦！
香港大學電子金融服務榮譽助理教授 徐燦傑