絲絲講場：柯大俠公子悄闖金融界
中策（00235）行政總裁兼副主席柯清輝曾經喺滙豐及恒生（00011）擔任高級管理層，佢位公子柯百達（Victor）亦甚得其真傳，已經靜悄悄涉足金融界，做緊投資公司經理，並開始喺金融圈活躍起來。
叁龍記者會低調撐場
柯公子外表斯文，十足青年才俊，行事仲好低調。絲絲尋日喺叁龍國際（00329）嘅記者會上見到佢，佢靜靜咁坐埋一邊，即使主人家喺場內不斷派發電子煙畀各位嘉賓試吸，柯公子都冇食埋一份，似乎唔多想引起其他人注意。不過，當絲絲走過去同佢傾偈，佢亦好大方咁自我介紹，話今次係以嘉賓身份撐場，有機會都會試吓支電子煙喎。
叁龍國際呢間公司以前名叫如烟集團，「叁龍」原來係代表過去、現在及未來，雖然主席王彥宸已宣稱，暫時唔諗住喺香港賣電子煙，但將來就會全力拓展電子煙等三大業務，兼捍衞電子煙嘅知識產權，因為呢隻電子煙嘅毛利率都幾高咁話。家陣公司仲與各地大型煙草商尋求緊合作機會，所以供股後所得資金仍未有定案，不過王主席重申之前減持公司股份，係基於私人財務需要，強調公司財務狀況穩健。
余絲韻