倫敦係歐洲嘅中心，附近嘅有錢佬都慕名而來，好似中東油王、俄羅斯首富咁，佢哋去英國買樓買車唔在講，有啲連成間球會都買起埋。喺5至10年前，俄羅斯富豪充斥倫敦，所以嗰陣好多人笑稱倫敦係泰晤士河畔嘅莫斯科，不過今時今日，就變咗泰晤士河畔嘅上海。
中國居民愈來愈有錢，得閒就梗係要出國玩吓，掃吓貨買吓名牌，特別係中國對奢侈品抽稅抽成20%，好多時候出國買名牌仲划算。絲絲前排去歐洲旅行時，諗住買番幾個手袋，點知一入到去全部都係同胞，可想而知內地消費力幾咁厲害。
特別係依家人民幣升值，中國居民嘅購買力相信可以進一步提升，而且呢一班中國富豪非常年輕，財富好有可能會繼續增加，係未來唔少歐洲名店嘅長期客仔。
據統計，中國富豪最鍾意買勞力士之類嘅名牌；房地產方面，倫敦市中心差唔多20%嘅物業已經落入中國人手中。
余絲韻