絲絲講場：山頂搞展覽維他奶「晒冷」
早前維他奶（00345）為咗慶祝今年七十周年嘅大日子，專登設計咗70款「個個祝」包裝特別版嘅維他奶，即時掀起維他奶熱潮，絲絲嗰時出街都見到唔少人拎住飲㗎，為咗將呢股熱浪延續落去，維他奶今次就喺山頂廣場搞咗個「維他奶Friend祝70年」展覽，尋日已經正式開幕，等大家可以近距離回味與維他奶一齊成長嘅片段。
發展歷程同回味
喺展覽當中，會由維他奶嘅誕生講到依家嘅業務發展，亦會展示咁多年來包裝嘅發展歷程，包括第一代嘅玻璃樽、全港第一包250毫升及375毫升紙包飲品等，仲有全球維他奶產品一次過「晒冷」，當然亦唔少得早前好受歡迎嘅70款「個個祝」包裝喇！
佢哋喺場內仲設咗個有獎競猜遊戲，考吓大家眼力及運氣，就係要估吓會場入面嘅特大維他奶樽內裝咗幾多粒黃豆，得獎者有機會得到一份紀念品㗎！
「維他奶Friend祝70年」展覽期會由本月五日至三十一日，係免費入場嘅，如果大家喺山頂廣場消費滿70蚊，仲有機會免費換Q版維他奶添，各位Fans記得去捧場兼細味一下維他奶陪伴大家成長嘅滋味喇！
余絲韻