絲絲講場：洪丕正跑輸隊友冇緊要
渣打集團（02888）上半年業績都算靚仔，之不過香港區嘅貢獻就有啲失色。大家一向都關心喺咁多個地區之中，邊個地區最叻仔，幫渣打賺到最多錢，上半年香港就輸咗畀印度，呢個賽果令絲絲個心有啲翳住，反而渣打香港掌舵人洪丕正（阿Ben）就好平常心，佢話最重要嘅工作係喺香港爭取市場佔有率，而唔係要打低自己人喎。
「唔需要打低自己人」
對於連日被追問香港盈利貢獻排名墮後嘅問題，阿Ben尋日笑笑口話，自己作為渣打嘅一分子，其實好開心見到印度有咁嘅成績，只係旁人比起佢唔開心啫。佢對香港業務表現好滿意，又認為香港潛力依然好大，唔會擔心香港嘅業務前景，總之就係最緊要幫集團賺到錢，唔需要打低自己人。
絲絲記得渣打早喺一八五九年就嚟到香港扎根，雖然香港地方細，但多年來都幫渣打賺過唔少錢，成為渣打會生金蛋嘅鵝，亦一直係集團最大盈利貢獻嘅地區。絲絲唔係馬後炮，喺三月份渣打公布去年全年業績時，已經發現印度悄悄追上嚟，盈利貢獻僅次於香港，點知好嘅唔靈醜嘅靈，香港咁就失咗集團No.1盈利貢獻嘅地位，唔單只輸畀印度，亦同時輸畀其他亞太地區。
香港難保盈利「一哥」
到底其他亞太地區係包括乜嘢地方？阿Ben話，呢區主要國家包括中國大陸、台灣、馬來西亞、印尼及泰國，五地合佔該區收入及稅前盈利嘅85%。大陸市場將會係未來業務增長動力嘅火車頭，睇嚟未來嘅大趨勢，香港嘅盈利貢獻老大哥地位都好難保得住，多數都會跑喺後面。
余絲韻