市場熱線：中航科工強勢破位

日經平均指數昨日升1.7%，其他亞太區魚缸個別發展。祖國魚缸現回吐，滬綜指繼續喺2,600點水平整固，收場報2,620點，跌0.67%。國統局數據顯示，截至今年六月底，全國房地產開發企業商品房待售面積達1.9億平方米，同比增長6.4%，顯示住房空置率高，樓價上升係由投機因素推動。官方主動提供更多市場數據，讓消費者了解供應情況，顯示上大人繼續調控樓市嘅取態未變。

適逢昨日又再有內房股趁升市配股集資，保利香港（00119）以每股8.8元配股集資35.2億元，惹來市場關注內房股伸手活動可能陸續有來，難怪尋日本地魚缸內房股持續受壓，都係莫買當頭跌。

恒指尋日波幅唔夠兩百點，最終微升1點，報21,551點，大市成交609億元。火車頭大笨象（00005）未見有太大回吐壓力，收報82.65元，升0.43%；祖國移動（00941）升穿80元後亦打破悶局，收報82元，升0.99%。兩隻火車頭唔願跌，加上陸陸續續宣布嘅大企業業績消息趨向正面，淡友暫未有反攻機會。

大市雖然靜局，但唔少股份就有炒作，中央對新能源汽車帶來千億補貼，刺激相關股份做好，其中天能動力（00819）急升12%，但係近排呢類政策股，升完一日就無晒影，所以唔建議咁急追入，情願睇定啲再算。

古勝最近吼緊隻中航科工（02357），昨日再升超過4%，收報3.22元。集團經過一輪重組注資後，已成功轉型，將業務重點放係航空產品及相關業務。

集團最近就公布旗下附屬洪都航空（600316）計劃出資3.06億元人仔，與多間公司成立合營，主要從事祖國及國際商用飛機大部件、零組件設計、研製、生產、銷售及服務，同時亦會進行航空學技術開發同埋相關產業開發，完全配合公司轉型以航空業為發展重點方向。

母公司注資步伐未停

今年三月中航科工已向母公司購入兩家從事大氣數據採集系統及航空儀器儀表產銷嘅公司，估計母公司未來仍會陸陸續續向中航科工注入同航空相關嘅業務，進一步壯大中航科工規模之餘，同時亦肯定公司為系內航空業旗艦嘅地位。

值得留意係，中航科工揸住多隻A股，除洪都航空外，亦有哈飛股份（600038）等，A股近日走勢回勇，自然水漲船高。

中航科工近日拾級而上，股價經過早兩日整固後，尋日強勢再現，並重上100日線以上水平，成交亦見配合，相信在憧憬母公司注入資產下，股價長炒長有，現水平絕對買得過。

戰報

中國大冶有色（00661）+11%

詩詩尋日話隻大冶有色博得過，尋日以全日高位0.475元收市，以低位0.425元計，升幅有11.7%。

飛克國際（01998） +14%

桃桃周二推介的飛克，尋日一度高見1.92元，較推介當日低位1.68元計，累積升幅有14%。

古勝