絲絲講場：騰訊推手機傳投MeeGo
iPhone 4全球熱賣證明手機市場嘅巨大潛力不容忽視，「QQ之父」騰訊（00700）主席馬化騰亦似乎對呢個市場虎視眈眈，內地就再傳出騰訊喺年底以自有品牌推出手機，今次嘅版本更加言之鑿鑿，話騰訊將會投向諾基亞之前推出嘅MeeGo手機平台，實行要與蘋果公司嘅iPhone、Google嘅Android來個三分天下！
騰訊要推出自有品牌手機呢個消息，喺內地其實已流傳一段時間，有消息話騰訊之前曾經考慮加入Android平台，最終轉投MeeGo除咗出於技術因素外，亦係考慮到投向MeeGo平台可以建立類似Android與中移OPhone嘅深層次合作關係，有利進軍中高端市場。
抗衡山寨手機通訊
騰訊進軍手機業務嘅其中主要原因，係內地不少山寨手機本身都內置不同嘅即時通訊及網遊軟件，其廣大嘅用戶群甚至有可能對騰訊嘅未來構成影響。其實市場早前亦有傳騰訊正與有「山寨王」之稱嘅聯發科進行合作，以使騰訊嘅網上應用全面打入山寨手機為主嘅低端市場，以免騰訊辛苦打來嘅市佔率被「山寨化」。
余絲韻