絲絲講場：傅育寧傳「升呢」坐正
早前傳出招商局集團董事長秦曉好快會退休，市場好關注邊個會接呢個位，最近絲絲嘅老友就話，真命天子會係招商局集團總裁傅育寧。
絲絲尋日與中資航運界老友傾開呢個傳聞，大家都覺得空穴來風未必無因，而且傅總由九八年開始入職歷任集團常務董事、副總裁及總裁，喺招商局做咗十二年，加上又被公認做嘢有魄力，坐呢個位實在當之無愧啦。
總裁位或要換人
不過老友話根據中國公司法，紅籌國企嘅總裁及董事長職務唔可以由一個人同時擔任，以免有角色衝突，呢個一直係早幾年國企改制嘅重點。
所以如果今次傅總真係坐正，咁佢喺集團嘅總裁職位又要搵第二個接替，即係話秦曉一旦退休，就會有兩個職位變動。
咁依家傅總喺招商局國際（00144）、招商局中國基金（00133）以及深交所上市嘅深圳赤灣石油基地公司嘅主席等職務，可能都要一齊換人頂替，究竟邊個會代佢？咁大家就要拭目以待喇，事關紅籌公司管理層呢啲嘢真係要等國家拍板。
余絲韻