金融海嘯期間，金融業成為重災區，香港銀行界嘅「炒人」舉動一浪接一浪；隨着經濟逐步好轉，股市彈升，市場對理財產品稍為重拾信心，家陣要招聘就變得有難度，就連本地大僱主滙豐及恒生銀行都慨嘆請人艱難！
○八年曾經大舉「炒人」嘅滙豐，喺去年下半年已開始密密招聘，每次請人嘅數目都有成百人或以上。日前佢哋集團公布業績時，亦有提及未來要請幾多人。
滙豐亞太區行政總裁王冬勝話，佢哋重點發展嘅中國、印度及澳洲等地均持續增加人手，而中國今年就會至少再請多300至400人，香港亦唔例外，要請多啲人手，尤其係前線銷售人員。至於恒生副董事長兼行政總裁梁高美懿亦話，計劃今年喺香港及內地分別增聘400及200人，合計共600人。
不過講咁多都冇用，絲絲發現滙豐香港區上半年人手總量比去年同期多咗嘅人數都唔夠100人，計埋亞太其他地區，亦只係多咗364個人，正好反映佢哋人手流失量唔係一個小數目。王冬勝話由於財富西向東移，金融人才更加搶手，流失量大亦可預期，所以滙豐對市場薪酬調查都着緊咗好多。
無怪乎銀行請極都請唔夠人，梁太話恒生有好多空缺，但請人有困難，為咗挽留人才，部分工種毋須等到出年亦有人工加，換言之，剛啱喺四月整體員工加人工後，會按員工表現及工種會再加多一次人工。梁太仲話，唔可以等員工「遞信」嗰一刻至做嘢，流失量高嘅工種，員工未「遞信」就要做定工夫。
余絲韻