近排金融市場上上落落，唔同人都有唔同睇法，有人話升，有人話跌，你講晒啦，不過，筆者覺得，喺上落市中永遠都係大家靜待黎明嘅時候，睇吓邊個贏咁解啫。
你有你等，內地班資本家已經「靜靜地起革命」，準備為「下一個牛市」作好準備，其中，最快手嘅，莫過於進軍香港金融及證券市場。小型QFII嘅可信性又同時喺呢隻鑊上「火上加油」。
近期，各大證券行都好似「待嫁姑娘」一樣，扮靚靚，等待內地新郎哥「一吻定情」，從此邁向康莊青雲路。筆者聽到各大證券行都開始唔少「相睇活動」，為自己搵個好歸宿而作好準備。
唔單止證券行，連某香港財經資訊公司都得到內地證券軟件及財經資訊商大智慧嘅垂青，有國家發改委做見證人，共偕白首，都咪話唔犀利。戀愛令人盲目，都唔好唔信。
喺21世紀，策略聯營（Strategic Alliance）同收購合併（M&A）實在係無可厚非，要成功，除咗有實力之外，仲要不斷「突變求生」同擁有「善價而沽」嘅心態，正如一位投資前輩所講：「價格係需要等待嘅！」有價有市都唔走，仲等幾時啊？
香港大學電子金融服務榮譽助理教授 徐燦傑