內地著名體育品牌李寧（02331）慶祝成立二十周年，順便改Logo及改口號，諗住可以吸引多啲「90後」嘅年輕人幫襯，點知佢哋嘅新Logo市場唔太受落，絲絲聽內地朋友講，話李寧嘅新Logo只顧取悅「90後」，反而忽略咗「70後」及「80後」，有網友話佢買咗一件換咗新Logo嘅李寧衫，其他人就以為佢買咗一件「翻版」李寧衫，真係唔知好嬲定好笑！
絲絲知道，李寧品牌重塑已經一個月，新Logo係以「李寧交叉動作」為藍本，將原有口號「一切皆可能」改為「Make The Change」。
但新Logo受到唔少人嘅批評，其中網友批評最為直接及最狠，佢哋話Logo「好似二流品牌嘅標識」、「沒有超越前面嘅Logo，係一種倒退」等。
有人認為李寧新廣告只顧「90後」，令到「70後」及「80後」嘅消費者好失落，亦有人因而抵制李寧；但有業內人士認為，品牌重塑已係內地品牌嘅一大進步，在意識及理念上跨出一大步。絲絲覺得雖然批評比較多，但能成功引起市場回響，已達到宣傳嘅效用喇。
余絲韻