近年港交所（00388）積極開拓上市公司來源，不斷到海外市場推介，吸引公司來香港上市，身為主席嘅夏佳理亦身體力行，去海外市場推介嘅頻密度，就好似我哋搭巴士咁。
今年下半年，夏佳理嘅外訪行程都已排得密麻麻，好似喺十月會去德國及法國，十二月就去巴西，仲有投資銀行游說想佢今年去非洲尼日利亞推介當地資源類公司來港上市。不過一聽到去尼日利亞，夏佳理嘅奧地利籍太太夏安麗就反應頗大，坦言尼日利亞嘅治安令佢有啲擔心。一向愛妻嘅夏佳理，唔知點樣說服太太畀佢去尼日利亞推介呢？
其實除咗治安，當地嘅環境衞生問題亦要注意，絲絲就去過非洲西部嘅安哥拉，又要打針又要食藥，都咪話唔怕怕。
除咗巴西之外，夏佳理其實對尼日利亞市場有頗大嘅期望，因為尼日利亞以天然資源豐富見稱，尤以石油為甚，該國係石油輸出國組織嘅成員。夏佳理覺得尼日利亞企業來港上市呢條路與俄羅斯企業有啲相似，即係佢哋本來會去倫敦上市，依家或者會考慮嚟香港。
余絲韻