期指觀瀾：小注即市試沽博微利

本周初策略，係情願錯過唔想買錯，惟以港股昨日走勢，加埋收市後外圍市場強勢畢呈，走雞感覺又確係唔好受。恒指尋日以近全日高位收市，升382點報21,412點，重磅股滙控（00005）加埋三大國有銀行帶來130點進帳，期指轉炒高水，報21,422點。

來自美國的貸款撥備大減，滙控業績較預期好，唯一美中不足是中東貢獻較大行估計稍稍遜色，從倫敦時段堅挺的走勢可見影響唔大。除非美國尋晚ISM數據有意料之外結果，今日好友再下一城將港股推至21,500點樓上機會極高。

筆者承認策略過分保守，等期指回補20,685點上升裂口才買，看來得個睇字。

雖然睇好後市，但錯過21,000至21,400點的升幅，總不想今早嚴重超買下摸頂揸貨，想買最好等調整出現，進取的筆者會試一試早上以四分之一注碼即市試沽，實行偷雞，目標在21,500至21,550點開倉，但不會過夜。

John Mullen