孖妹缸湖遊：滙豐古鈔股票邊樣值揸

每個香港人可能都曾經中過「滙控毒」，即係希望擁有至少一手滙控股票。不過，一山還有一山高，香港錢幣研究會會長馬德和同貨幣世界高級顧問梁裕棋就仲勁，佢哋不僅投資滙控股票，仲投資埋滙豐銀行發行嘅紙幣，二人更異口同聲咁話：「最多人鍾意收藏一九一○年至一九三○年代嘅滙豐紙幣（俗稱：風景紙），因為顏色好靚，紙幣上面又印有一啲中國色彩同英國殖民地色彩嘅圖案，欣賞價值程度好高。」

馬：香港錢幣研究會會長馬德和

梁：貨幣世界高級顧問梁裕棋

舊紙幣升值潛力高

高妹：其實滙豐啲舊紙幣都唔用得啦，點解反而愈舊愈矜貴嘅？

馬：舊紙幣有升值潛力，第一係佢已經變成絕版，第二發行量少，現時古鈔嘅價錢由萬元至幾十萬元不等。好似我有張一九二三年滙豐銀行嘅五蚊紙幣，依家約值廿萬港元，一張古鈔分分鐘有過百年歷史，有時候人命都無咁長啦，你話係咪值錢先？

高妹：有道理喎！咁張五百蚊嘅「啡妹」又真係幾靚嘅。

馬：係㗎！而決定一張古鈔值幾多錢，主要取決於三大因素，即罕有性、大面值、品質要良好。一百年前，呢張「啡妹」就可以買到一個物業啦，唔係平民百姓可以擁有得到㗎，佢哋可能見都未見過添呀。

高妹：咁你除咗收集滙豐古鈔，又有無買佢嘅股票呀？雙管齊下嘛，哈哈。

馬：我揸咗滙控股票成廿年，呢隻股票真係幫我致富，八十年代開始，佢嘅增長潛力好高，喺銀行界近乎處於壟斷地位。不過九七、九八年我將所有股票沽晒，包括滙控，平均賣出價都有100蚊。原因係我發現股市同好多投資產品都出現變化，加上自己都退休啦，費事再揸股票啦，依家主要持有物業同投資古鈔。

投資股份財息兼收

莉莉：傾開偈先知，原來你以前喺滙豐銀行打過工，怪唔得之你對佢情有獨鍾啦。

梁：我收藏滙豐古鈔多達幾千張，自己亦持有唔少滙控股票，之前我都係全數供股㗎。依家佢嘅股價見番80蚊，遲啲又話去內地上市，加上品牌又值錢，所以我對滙控前景充滿信心。

莉莉：咁你覺得滙豐古鈔值錢啲，定係滙控股票值錢啲呀？

梁：梗係股票啦。始終玩古鈔嘅人唔夠買股票嘅人多，而且銀行會做生意，又有利息派，而古鈔係會升值，但唔會生息嘛。不過，投資古鈔一定要有耐性，同埋買入啲絕版、品質好嘅，其升值潛力先至會高。

莉莉：不過，股票股價都會跌啦，咁古鈔價值又會受咩影響？

梁：古鈔會受經濟氣候影響，經濟惡劣時，古鈔都會貶值，現時有啲古鈔都未回升返去九七年水平㗎。另外，古鈔都係用紙造，所以收藏家一定要好好保存，例如唔好令張紙幣有摺痕、發黃、脫色、破爛等等，否則都會令古鈔價值下降。

莉莉：嘩，原來收藏古鈔都有咁多學問㗎！

梁：其實古鈔真係好有歷史價值，大家可以從一張紙幣上面嘅圖案，知道當時社會風氣和面貌，欣賞價值十分之高，相反股票就無咩嘢好睇啦。而且，古鈔出現一條摺痕，價錢已經會相差幾十倍，但股票摺一摺都得嘅。

押重歐美 仍存隱憂

記得金融海嘯時期，滙控股價除試過跌至33蚊低位，後來更出現28蚊供股事件，當時即係現任中大全球政治經濟社會科學碩士課程兼任講師黃元山更發表過「滙控股價或穿10蚊」嘅驚人言論。不過，隨住環球經濟狀況改善，加上各國政府大力救市，唔少股份股價已升番一定水平。面對今日嘅滙控公布業績，孖妹亦好難得再次搵到黃元山評論一下滙控前景。

高妹：你覺得今次滙控上半年業績係咪會有好轉呢？

黃：當然會有改善啦！自從發生金融海嘯後，美國同其他歐洲國家都用咗好多招數去救市，例如美國大量印銀紙，又將有毒資產抽離銀行，從而幫銀行換來現金，即係「利療傷」，咁樣銀行業一定會有受惠，滙豐都唔例外，盈利有增加都正常。

莉莉：現時摩通將滙控嘅目標價升至115蚊，係咪代表佢已經無晒隱憂，股友可以買入長揸？

黃：銀行係做槓桿化業務，而「槓桿」即係拎到借貸之後，有一蚊就借出九蚊去做十蚊嘅生意，即係十倍槓桿。滙控業務有三分之二分布於歐洲同北美，只有三分之一係屬於新興市場，而歐美經濟始終存有好多隱憂，如果投資者係有信心，又承受到風險，佢哋可以買入，但我會有擔心囉。

高妹：記得舊年你講過，滙控會跌穿28蚊供股價之餘，更有可能出現第二次集資，點解當時你睇得咁淡？

黃：首先我嘅言論唔係針對滙控，當時嘅經濟局面，加上滙控業務及資產分布形勢，我先有呢個睇法。其後各國政府推出救市措施，出手力度亦比我想像中為大，政府行為係會影響經濟形勢，對股份股價亦會有正面影響，滙控股價有改變都合理。

37%散戶擬追貨

滙控今日公布業績，近日獲不少券商唱好，股價走勢亦見凌厲，唔知各位又會唔會追入呢？據今期《東方產經》網上民調，截至上周末晚上6時嘅結果顯示，37.8%嘅人選擇「會，趁機吸納」、24.8%嘅人選擇「不會追入」、20.8%嘅人選擇「不會，趁高減持」、16.6%嘅人選擇「維持觀望」。

高妹、莉莉

若有料報畀高妹同莉莉或有嘢問，可電郵money.biz@opg.com.hk