張汝京離開一手創立嘅中芯國際（00981）不知不覺已八個多月，絲絲記得當日同過半導體業界人士傾過，認為張總唔會從此消失，結果不出所料，張總決定東山再起，只不過今次再唔係搞芯片，而係轉行搞LED。
絲絲知道，一個由張總主導嘅LED項目日前喺上海市簽約，聽講項目將落地浦東新區臨港新城產業區。
至於點解張總會搞LED？張總原本喺美國已經拿到新能源工程碩士學位，之後喺德州儀器做嘢時又試過開發「特殊太陽能發電系統」，創立中芯之後更加試過搞太陽能業務，可見佢對發展新能源嘅興趣絕對唔細。既然搞芯片唔係咁順，不如試吓搞新嘢，話唔定搞出個未來。
余絲韻