絲絲講場：大新IQ博士卡小雲助興
絲絲尋日走咗去動漫節逛一逛，巧遇大新銀行喺現場有嘢搞，原來佢哋趁動漫節開幕，搞個推出全港首張IQ博士信用卡嘅儀式，執行董事藍章華仲親自出席，開幕儀式當然唔少得主角小雲出嚟助興。
「便便」人氣爆燈
佢哋都show咗幾款IQ博士信用卡，絲絲望嚟望去啲卡款都唔見咗IQ博士，何解呢？一問之下，先至知佢哋銀行發卡前做咗個調查，受訪嘅對象主要係第一代睇IQ博士嘅人，結果發現最受歡迎嘅人物都係小雲同小吉，跟住就係小雲好鍾意篤嘅「便便」，真係估唔到呢舊「便便」原來咁受歡迎，人氣指數仲高過忽然變靚仔嘅IQ博士，成個發卡系列叫做IQ博士信用卡，但就欠咗呢個IQ博士，都好似爭咁啲。不過，大新已補飛話唔排除之後會有其他IQ博士人物嘅信用卡出現。
余絲韻