偉易達（00303）上咗市18年，一直係基金愛股，股價自○五年開始發威，依家已爬升到82.6元，買一手要八萬幾蚊，門檻真係幾高，唔計成分股，喺眾多「非藍血」嘅股份中，真係數一數二門檻最高嘅股份，尋日佢地決定將門檻降低，一手1,000股變為100股，實行「大牛龜」大瘦身，應該可以幫公司增加股東基礎。
藍籌股拆細買賣單位屢見不鮮，好似港交所（00388）咁，○七年獲外匯基金增持，股價最高見268.6元時，每手入場費盛惠13.43萬元，令到好多散戶望門興嘆。所以港交所喺○八年四月就由500股拆細為100股，等散戶有得玩。
絲絲翻查過資料，股價要幾十甚至上百嘅非藍籌唔算多，呢啲公司好多都通過細單位買賣以提高流通量。好似股價要226.2元嘅渣打（02888），每手50股，萬零蚊有得玩；保誠（02378）每股68.3元，每手只係500股；南戈壁（01878）98.1元，每手50股，入場費只係幾千蚊。
門檻較高嘅非藍籌，包括萬邦投資（00158）、國浩（00053）同埋濰柴動力（02338），入場費由四萬至七萬幾不等，但都低過偉易達。值得一提係俄鋁（00486），因應監管嘅要求，門檻定得好高，一手要2.4萬股，以收報8.38元計，即係入場費要20.112萬元，貴絕港股。
余絲韻