全球經濟雖然都係「唔上唔落」，不過紙品市場嘅需求就「靜靜起飛」，正式起錨，相關股份板塊又可以受惠。
陽光紙業（02002）即刻率先發出盈喜，預期中段業績將會按年急升近5倍咁誇張，消息一出，其他紙業股嘅股價都全部登天。
喺需求同毛利率雙雙向好下，我就覺得紙業股喺短線將可以跑贏大市，當中唔使講梗係龍頭股份玖龍紙業（02689）最值得關注啦！
環球商業活動一步一步向好，紙品價格已由四至五月時嘅每噸200美元低位回升到近期嘅每噸240美元，同年初每噸280美元嘅價格距離明顯縮窄咗，即係話紙品需求旺季又已經降臨，紙業股嘅營業額又有機會得到雙位數字增長。玖紙班管理層亦趁紙品需求回升，提高咗產品售價，令到企業邊際利潤又可以進一步增加！
留意玖龍紙業亦同時受惠於人仔嘅升值前景，由於佢嘅主要原材料係美國進口廢紙，當人仔匯價走高時，玖紙嘅營運成本又可以相對降低。
另外，人仔升值又相對地減低咗玖紙嘅外匯負債，令到佢嘅財政架構獲得改善，更加健康，股價同成績又點會唔好啊！就算玖紙嘅營運能力無乜改善，匯率因素亦都令到佢有近一成嘅盈利增長，睇實啦！
香港大學電子金融服務榮譽助理教授 徐燦傑