星謙化工（00640）雖然「細細粒」，不過尋日搞投資者推介會，竟然有唔少知名人士撐場，好似近排搞到滿城風雨嘅瑞年（02010），佢哋嘅主席王福才及首席財務官潘翼鵬就結伴出席；仲有長實（00001）副董事總經理兼執行董事葉德銓亦有到場，據指長實都有興趣入股星謙。
睇番資料，原來潘翼鵬今年三月開始就做咗星謙嘅獨立非執董，加埋瑞年主席王福才都有蒲頭，睇來呢兩間公司嘅關係唔錯。據稱就係由於兩間公司好老友，橫掂星謙上市都要請人做非執董，所以就順手搵瑞年幫手。除咗潘翼鵬之外，新世界（00017）高級投資總監及新世界策略投資嘅執行董事何智恒亦都係星謙化工嘅獨立非執董，咁啱海通香港就係星謙保薦人之一，睇嚟呢一路人馬亦有好大關係。
星謙尋日剛啱開始招股，有幾間券商夾埋已經借出咗超過一億元孖展，公開發售部分就差唔多超購10倍。
余絲韻