港交所（00388）今年新官上任又豈止李小加，市場發展科主管羅力都喺二月初毅然離開從事25年嘅老本行，轉投港交所懷抱，單睇兩人嘅就任時間表，絲絲都估到李小加「有做嘢」，一手拉攏羅力過檔圖謀組織新班底。羅力喺本月嘅季刊中，就親自揭開跳槽之謎。
羅力嘅老本行係投資銀行，佢與小加嘅交情原來要追溯到○○年開始，先後喺美林及摩根大通共事近5年。直至小加做咗港交所行政總裁，兩位昔日同儕就多次溝通，成功勾起羅力但求見證中港財政制度進化嘅興趣。佢覺得依家港交所企喺史無前例嘅轉捩點上，前面就係人民幣國際化遠景，若能參與其中，即使略盡綿力都好振奮。
佢都好謙虛話，對首次公開招股及股本集資熟悉好多，但關於投資者、對沖基金及資產管理方面嘅業務上就涉獵唔多，家陣要學好多嘢，感覺似「上幼兒園同時又要考博士學位」，好彩其他部門主管都對佢呢位新人循循善誘。回想過去25年，首9年在美國，跟住嘅16年喺香港，淨係喺北京嘅時間加起來超過400個晝夜。
雖然手頭有好多重點工作，既要擴大內地業務發展，又要招攬國際企業來港上市，但羅力話家陣嘅首要任務都係組建團隊，增加多啲人手。
余絲韻