絲絲講場：匹克NBA中國行 球星效應回報好
絲絲成日聽到啲人話中國依家要靠內需推動經濟，賺13億人嘅錢都夠喇，但品牌變得國際化會值錢啲，所以匹克（01968）使咁多錢去贊助12位NBA球星。唔經唔覺，佢哋今年第5年搞NBA球星中國行，日前仲喺北京舉辦咗個主題為「集結夢想、拼出榮耀」嘅開幕禮，包括有阿泰斯特、吉德等5位球星出席，跟住就會開展一星期嘅「親善之旅」，走遍杭州、西安等18個城市，與球迷嚟個近距離接觸。
贊助球員理性分析
匹克行政總裁許志華話，呢個活動對於二、三線城市嘅球迷嚟講，可能係改變佢哋一生嘅事，又可以有效咁推廣品牌，真係一舉兩得。佢仲話自己一直有個夢想，就係簽晒所有NBA球員，但佢都知呢個係「Mission impossible」，所以就專門選擇一啲積極向上及努力拚搏嘅球員，咁先可以完全傳達出匹克嘅品牌價值喎。
佢透露，球星效應對於生意嘅回報唔錯，而球星一般合約期由3至5年不等，而且佢哋自己仲建立咗個NBA球員數據庫去分析，所以會理性咁簽球員。
另外，許總亦不遺餘力咁推動緊祖國嘅體育事業，最近就捐咗50萬元去玉樹，以支持當地青少年發展體育才能。
余絲韻