外界成日認定金融界圈中人貪婪，查實有愛心者大有人在，對沖基金經理錢志健（Ed）近期就為咗做慈善而扭傷腳。話說每年十月舉行嘅「對沖基金拳擊之夜」，會喺決賽當晚進行籌款，一向積極做善事嘅Ed亦有參賽，雖然佢之前有玩開Boxing，但可能自己訓練嘅過程太嚴格，就咁扭傷咗隻腳。
Ed講起時都若有所失，「其實好想繼續練落去，不過醫生勸喻，如果堅持練習，之後一世都行唔到。依家休養咗三個禮拜，好番好多，惟有留待下年再參賽。」
Ed做慈善不遺餘力，有時周末會做監獄探訪，嚟緊八月冇諗住抖暑，將時間留嚟做慈善，喺八月會以自家組成電單車「盼望之旅（Ride 4 Hope）」嘅名義到青海籌款。另外，佢喺八月二十九日下午喺教堂有一個「善用萬多天」講座，分享另類「操盤」心得，教授如何成為「人生操盤手」，歡迎大家免費入場。
余絲韻