絲絲講場：陳南祿靚呔襯絕恒隆
陳南祿（Philip）以前打國泰（00293）工，向來獨愛紅色領呔，啲領呔好多時仲印滿飛機公仔。依家過檔恒隆地產（00101），唔知係咪想形象清晰啲，佢尋日以恒隆董事總經理身份會見傳媒，專登悉心打扮，打咗條新嘅綠色領呔，再襯上深藍色西裝，佢笑言 ：「藍綠，南祿吖嘛！」絲絲睇真啲，條呔除咗襯佢個名之外，仲與恒隆個Logo顏色相同，Philip果然細心。
與陳啟宗互笠高帽
已經返咗9日工嘅Philip，尋日與董事長陳啟宗（Ronnie）互笠高帽，Philip話一直好佩服Ronnie及恒隆嘅遠見和策略，Ronnie就稱讚Philip有國際視野，可以協助恒隆轉型，恒隆以前只集中香港，依家擴展至上海、瀋陽及濟南等多個地點，複雜咗好多，又要兼顧唔同地區文化，Philip喺國泰嘅經驗正好幫到手。
對於主管投資者關係嘅恒隆地產前執董吳士元（Terry）突然離職，引起市場唔少揣測，Ronnie都係嗰句「人各有志」，仲話IR（Investor Relation）係公司最易做嘅部門，無可否認Terry做得唔錯，但Philip與傳媒嘅關係都好好，大家第日可以搵佢喎。
波士冇薪酬話事權
Ronnie又話，剛退休唔做恒隆董事總經理嘅袁偉良，原來十八年前已經講定條件要喺二○一○年退休，而袁生提出退休後，一切招聘搵人都係由董事會主導。佢話恒隆好講求企業管治及企業文化，佢哋喺○三年已成立提名及薪酬委員會，員工工資就連身為董事長嘅佢都冇話事權，不過最搞笑嘅係委員會成立後，居然先發現Ronnie十多年來收咁少人工，年尾又唔收花紅。
余絲韻