市場熱線：361度增長強勁

下半場本地魚缸受歐洲魚缸開市做好所帶動，恒指一舉突破二萬一關口，高見21,008點，散場收報20,973點，升133點。雖然散場價未重返250日線之上，但觀其走勢，古勝有信心，恒指有條件在期貨場結算前，再挑戰21,300-21,500點水平。國企收報11,931點，暫未收復萬二點心理關口，同樣係時間問題，只要祖國魚缸回勇，國指要突破萬二關唔難。現貨場成交額539億元，照舊無驚喜，資金集中流入買重磅股，股仔未儲夠鑊氣，鑊鏟友集中炒輪同牛熊證。

本月好友大獲全勝

今日魚缸焦點會係官府拍賣地皮，仲有先揭開本地地主業績序幕的斑點狗（00101）。期貨場將於明日結算，唔使問好友大獲全勝，淡友就大揩，勝負已分，在下唔信淡友有機會走得甩。

藍色大隻佬表現好壞參半，畢竟連升六個交易日，有成分股成員抖氣好正常。奇怪係唔少本地地主箭嘴向下，可能早日累計升幅唔嘢少，引得獲利沽盤出現。QQ（00700）升3.4%係大隻佬升幅冧巴溫，上周股價逆市下跌，昨日一下追回升幅，收報143元。中信泰富（00267）升3%，收報16.06元，升幅僅隨QQ，缸邊友預期今年利潤有望大幅反彈。

周一勁升逾6%的富士康（02038），昨日逆市跌唔出奇，短炒有胡梗要食，獲利回吐跌0.9%，跟日前升幅相比濕濕碎。

古勝冇點你，話咗大笨象（00005）將重拾火車頭位置，股價勁升1.6%，收報78.85元。歐洲錢莊暫除不明朗因素，渣打（02888）創超過兩年高位，盤中高見225.6元，收報224.6元升3%。農行（01288）昨日盤中曾高見3.6元，為登陸魚缸後新高，芬佬「濕平」無手軟，皆因招股時未有踴躍入飛，但農行晒士之巨，令多個指數包括「大魔頭指數」等均向其招手，芬佬有買趁早。

毛利仍有上升空間

內需股受捧程度雖不如前，但仍有資金追入個別股份，361度（01361）公布第二季銷售數據，超過2,000間店舖的同店銷售較去年同期上升16.9%，因「五‧一」假期及其相關的促銷活動刺激銷售強勁增長。

截至六月三十日，來自約4,700間店舖的數字顯示，361度的零售存貨為2.5倍，而次季店舖數目增加淨額149間，令獨家銷售店舖總數增至6,927間。集團將保持年增600至800店，目標未來3至4年內達致1萬間。

人仔升值未對361度帶來影響，因產品全為內銷，集團暫亦未有計劃進軍歐美。此外，361度第四季定單金額增長強勁，遠高於同業。集團綜合今年四個季度計算，定單金額增長30%，加上產品平均售價亦有提升，令整體毛利水平仍有上升空間。以現價計算，今年市盈率為12倍左右，估值不算高昂。

戰報

光大控股（00165）+11%

古勝本月十九日叫候低收集光控，當日低位18.1元，昨日一度升上20.2元，累積升幅11.6%。

重慶鋼鐵（01053）+7%

桃桃本月二十二日推介的重鋼，昨日高見2.22元，較推介當日低位2.06元升7.7%。

古勝