絲絲講場：施德論談督建滙豐總行
矗立喺中環嘅滙豐總行大廈係香港著名地標之一，唔經唔覺已經與港人共渡咗25個年頭，滙豐為咗慶祝呢座總行大廈落成25周年，由尋日起至八月二十日期間會舉辦一個展覽會，內容包括滙豐自一八六五年成立以來4幢總行大廈嘅歷史、依家總行大廈設計和興建嘅圖片及紀錄短片以及大廈未來嘅計劃概況。
滙豐專登搞咗個展覽揭幕儀式，絲絲見到滙豐香港區總裁Mark哥（馬凱博）之外，仲見到滙豐銀行前主席施德論，佢哋一齊主持呢個揭幕禮。點解會請埋施德論出席？原來佢老哥就係當年負責總行大廈興建計劃嘅總舵手，佢仲喺會上分享當年嘅點滴。
滙豐總行喺香港建築物群仍有一定地位，佢認為主要原因包括大廈處於一個空曠嘅空間，前面就係皇后像廣場，啲人好易望到滙豐總行，公眾又可以隨時經過呢座大廈，同時大廈層層疊嘅設計好特別。
逐件裝嵌講求精確度
講番當年興建呢座大廈嘅挑戰，施德論就話係來自設計隊伍，因為所有配件都喺海外製造，跟住運嚟香港，然後再將配件裝嵌，所以好講求精確度。佢話自己當年要協助項目經理睇住呢條數同埋項目嘅進度，又話所有有份參與呢個項目嘅人都覺得好自豪，呢個係一生人難得嘅機會。
Mark哥喺儀式上致辭時就話，自己年輕時揹住背囊嚟香港，第一眼睇到滙豐大廈，印象已好深刻，當年《時代》雜誌形容滙豐總行大廈係會成長而唔會過時嘅建築物，佢話真係講得好啱。
余絲韻